کیوں کر کہوں کہ تو نہیں کھاتا قسم غلط
اِس حُسنِ ظن سے ہو نہیں سکتا ہے غم غلط
آنا ہی آپ کو نہیں منظور میرے گھر
ہیں سب یہ عذر و حیلہء کارِ اہم غلط
دیکھی ہیں بعد عشق کے اکثر تباہیاں
یہ تجربے کی بات ہے، ہوتی ہے کم غلط
کیا ہو تمھارے وعدہ و پیماں کا اعتبار
تم ہو دروغ باف، تمھاری قسم غلط
ہم اپنا شکوہ یاد نہ رکھیں تو ہے بجا
تم اور بھول جائو جفا و ستم، غلط
اے دل! نہ پوچھ برہمن و شیخ سے سراغ
دونوں بتائیں گے رہِ دیر و حرم، غلط
احسن! نہ پائے گا وہ رہِ راست عمر بھر
ڈالا ہے جس نے عشق میں پہلا قدم غلط
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجموعہ کلام: احسن الکلام
مرتبہ: سید سعید احسن مارہروی
پبلشر: مکتبہ تخلیقِ ادب، آدم خاں مارکیٹ، بندر روڈ، کراچی
طابع: ضیا برقی پریس، کراچی
سنِ اشاعت: ۱۹۶۵ء (اشاعتِ اول)
